Minnesota:- Soomalida Minnesota ayaa si kal iyo laab ah u soo dhaweeyey Amiir Mohamud Yusuf Ciise oo ka mida Isimada Puntland. Waxaa xafladdaan oo casha sharaf ahayd ka hadlay dhammaan Isimada Soomaliyeed, Culumo awdiin, Aqoon yahano.

Ahmed Mohamed Warsame Islaam ayaa ku soo dhaweeyey Amiir Mohamud inuu Qudbo u jeediyo Soomaliweynta dagan Minnesota wuxuuna yiri Beeshayda ayaa dooratay waana Islaamkii labaad Amiir Mohamud waana soo dhaweynaynaa haddii aad tiraahdaan maxaad ku fasheen Isimkaan labaad Islaam ayaad leedihiine waxaan idin leeyahay haddii aad geed liin ah beeratid oo liin macaan kuu dhalo soo geed kale ma beeranaysid macaanka ay leedahay ayaan helnay sidaas ayaan Amiir u samaysanay.

Amiir Mohamud ayaa kumanaan Soomaliya oo Golaha Dhaqanka Soomaliyeed hor kacayaan usoo dhaweeyeen si diiran Amiir Mohamud ayaa khudbadiisa kaga hadlay Taariikhdada Soomalida wuxuuna sheegay in ummadaha kale ay qortaan taariikhdooda laakiin Soomalida ay yihiin kuwo Taariikhdooda umado kale ay u qoreen.

Amiir Mohamud wuxuu tilmaamay in Soomalidu ay isku meel ka yimaadeen isku Diin, yihiin isku Luuqad yihiin, isku midab yihiin. waxaa daliil u ah in Taariikhda naloo qoray waxaa la yiraahdaa qaar baddan ayey soo mareen qaarna kor iyo Cirka ayey ka yimaadaan laakiin taas waa been waxaa u daliil ah ayuu yiri Amiirku Soomalida taariikh ahaan lama hayo Reer Reerka kale Diinta soo galiyey oo ku qasbay ama luuqadda ay lahaayeen u diiday oo mid kale ku qasbay.

Amiirka ayaa codsaday in taariikhda Soomalida la qoro lagana fagoodo wixii Soomalida kala dilay wada dhalashadooda. Amiirka ayaa ka hadlay Soomaliya Dowladda Puntland xaaladda Gobalka Mudug iyo Shaqaadadii ka dhacday. wuxuu Amiirku si tiiraanyo leh warbixin uga dhiibay una tacsiyadeeyey una duceeyay Wasiirka Warfaafinta Puntland oo mudo dhowr Bilood ka hor ah dablay Hubaysan ay toogasho ku dileen Amiirku wuxuu amaan gaara u soo jeediyey Beesha marxuumku ka soo jeedo.

Sidoo kale Xafladda lagu soo dhoweeyeynaayey Amiirka ayaa waxa ka hadley Sulddaanka guud ee Beeslaha Tunni Suldaan Faqi Siyid Faqi Sulddaan Faqi,wuxuuna si marxabbeysan u soo dhoweeyey Amiirka Maxamed Yuusuf,asagoo u mahad celiyey dhammaan Soomaaliweynta ka soo qeybgashey soo Dhoweynta Amiirka.

Ka dib Sulddaan Faqi ayaa Umadda Soomaaliyeed ugu baaqey inay iscafiyaan oo ay gacmaha isqabsadaan,soona celiyaan Midnimadii iyo karaamadii ay laheyd umadda Soomaaliyeed,wuxuu yiri Sulddaanku dalka dhibaato badan ayaa ka dhacdey Soomaalida dhaqankii Wanaagsanaa ee lagu yiqaanney ee Martigelinta dadka u yimaada qaran jab iyo dhaqan burbur ayuu u keeney qalalaashihii ka dhacey dalka soomaaliya Sanadihii aan soo dhaafney.

Sulddaan Faqi ayaa yiri markii uu burburku dhacey Soomaalidu Dalka Dibaddiisa iyo gudihiisa ayey ku kala qaxdey,kuwii Dibadda u qaxey Si bani aadanimo ah ayaa loo soo dhoweeyey,ha yeeshee kuwii gudaha ku qaxey ee Walaalahooda kale u martiyey oo la filaayey in Sidii Dhaqanka Soomaaliyeed ee Wanaagsnaa loo soo dhoweyn jirey loo soo dhoweyn lahaa,la tusi lahaa inaaney marti aheen ee ay u yimaadeen walaalahooda;ay isku beddeshey Xadgudubyo aad u fara badan oo dhaawacey Dhaqankii Wanaagsnaa ee Soomaaliya caanka ku aheed,wuxuuna Sulddaanku yiri Dadka Digil iyo Mirifle ee ku harey Dalka soomaaliya dhibaatadii gaartey waad Xasuusan tihiin.

Sidaas darteed Sulddaan Faqi ayaa Umadda Soomaaliyeed ugu baaqey inaaney mar dambe soo laabanin dhaqan Xumadaas iyo ceebtaas soo gaartey dhaqankii Wanaagsanaa ee Soomaaliya caanka ku aheyd,islamarkaasna la daaweeyaa nabaradii gaarey Walaalaha Soomaaliyeed oo dhan ay xadgudubyadu gaareen.

Dhinaca kale Sulddaan Faqi ayaa walaac xooggan ka muujiyey inuu sii lumayo oo uu sii dabargo’ayo Afka Soomaaligu gaar ahaan jiilka yaryar ee ku barbaarey Waddamada Qurbaha,wuxuuna Waaliddiinta iyo Aqoonyahanada Soomaaliyeed ee ku dhaqan Waddamada Qurbaha ku boorriyey inay dhaxda u xirtaan sidii Dhalinyarada iyo Jiilka soo kacaya loo bari lahaa Afka Soomaaliga iyo Dhaqankii ay Soomaalidu laheyd.

Ugu dambeyntii Sulddaan Faqi ayaa Shacabka Soomaaliyeed ugu ducueeyey inuu quluubtooda isku soo celiyo islamarkaasna siiyo nabadgelyo iyo Dowllad Soomaaliyeed oo caddaalladda ku Maamusha.