Maxamed Cumar Xabeeb (M/Dheere) oo ahaa  Guddoomiyihii hore gobolka Sh/dhexe  ayaa markii ugu horeysay ka hadlay aragtidiisa ku wajahan magacaabista Guddoomiye cusub oo loo  magacaabo gobolka Sh/dhexe.

Maxamed Dheere ayaa sheegay in Madaxweynaha uu ku degdegay magacaabista Guddoomiyaha gobolka Sh/dhexe isagoo sheegay in arrintaasi ay ka horeeyaan howlo fara badan oo uu sheegay inay ugu horeyso ka xoreynta gobolka ururka Al-Shabaab oo hadda gacanta ku haya.

"Gobol weli cadow heysto in Guddoomiye loo magacaabo waa laga qurux badan yahay" ayuu yiri Maxamed Dheere oo sheegay in howsha gobolka Sh/dhexe ka furan xilligaan inay tahay sidii gobolka looga xoreyn lahaa ururka Al-Shabaab oo uu sheegay inay gobolka ku hayaan dhibaatooyin kala duwan.

Hoggaamiyaha siyaasadeed Maxamed Cumar Xabeeb (M/Dheere) oo mar Guddoomiye ka ahaa gobolka Sh/dhexe ayaa sheegay in Madaxweyne Shariif looga baahan yahay haddiiba maamul loo sameynayo gobolka inuu marka hore isu keeno bulshada gobolka gobol u dhigo kaddibna halkaas ay isku cafiyaan kaddib ay sameystaan maamul ay iyagu soo doorteen.

"Haddii ninkii shalay adiga ku dilay canugaagana u magacaabay gobolka Sh/dhexe waa garan kartaa ujeedada uu ka leeyahay" ayuu yiri Maxamed Cumar Xabeeb (M/Dheere) oo hadalkiisa ay ka muuqato inuu soo gocanayo dagaalkii Midowga Maxkamadaha Islaamiga ah ee Madaxweyne Shariif guddoomiyaha ka ahaa ay kula galeen magaalada Jowhar ee gobolka Sh/dhexe.