General Ivan Koreta: "Al-Shabaab waxay doonayaan inay sameeyan wax walba oo ay waxyeelo uga geysanayaan gudaha Uganda si ay u waxyeeleeyaan ..."

Taliye ku xigeenka ciidamada Military-ga Uganda General Ivan Koreta oo u waramayay wakaaladda wararka ee Reuters ayaa sheegay inay hayaan xog muujinaysa in Xarakadda Al-Shabab maleegayso weeraro ay dalkaasi Uganda ka gaysato.

General Ivan Koreta waxaa uu xusay in wararka ay hayaan ay sheegayaan in xubno ka tirsan hogaanka Al-Shabab ay wadaan ol ole ay ku doonayaan inay kuwaxyeeleeyaan sida uu yiri shacabka wadanka Uganda islamarkaana ay ku doonayaan inay ku weeraraan goobo muhiim ah oo Uganda ku yaala yaala kuwaasoo ay doonayaan buu yiri inay doonayaan uga aar gudtaan hawlgalka ay ciidamada AMISOM ka wawdaan magaalada Muqdisho.

“Al-Shabaab waxay doonayaan inay sameeyan wax walba oo ay waxyeelo uga geysanayaan gudaha Uganda si ay u waxyeeleeyaan dad rayid ah taasina waxay ugu mar marsiyoonayaan doorka ay dawladeenu ku leeyihiin hawlgalka ka dhanka ah Al-Shabab ee Soomaaliya ka socda” ayuu yiri General Ivan Koreta oo ah taliye ku xigeenka ciidamada Uganda waxaana uu intaa ku daray in hay’adaha sirdoonka dalkaasi la socdaan dhaq dhaqaaqyadaasi.

Sarkaalkaani ka tirsan taliska ciidamada Uganda waxaa kale oo uu sheegay in dawladiisa ay wado qorshe ay ku kordhinayso tirada ciidamadeeda ku sugan Soomaali si buu yiri ay ugu guulaystaan nabad ku soo celinta Soomaaliya.

General Koreta waxaa uu xusay  in haddii la xoojiyo ciidamada AMISOM ay muddo kooban ku qaadanayso soo gabo gabaynta hawlgalka dalka uga saarayaan dagaalyahanada Al-Shabab nabadana ay ku soo celinayaan.

“Hawlgalka AMISOM ee Soomaaliya ka socda si fudud ayuu ku soo gabo gaboobi karaa haddii ay ciidamadeenu helaan taageero ciidan oo dhamaystiran” ayuu sidoo kale yiri sarkaalkaasi ciidamada Uganda u hadlay.

Xarakadda Al-Shabab ayaa horey wacad ugu maray inay weeraro ka geysan doonaan gudaha wadanka Uganda waxaana ay horey u sheegteen weeraro qaraxyo loo adeegsaday oo bishii July lagu qaaday magaalada Kampala oo ay dad badani ku waxyeeloobeen.

Ciidamada Uganda oo qeyb ka ah ciidamada midawga Africa ee AMISOM ayaa iyagana waxaa lagu eedeeyaa inay dad badan oo rayid ku laayaan  magaaladda Muqdisho kadib marka ay madaafiic culus ku garaacaan goobo ka baxsan furumaha ay kula dagaalaan Xarakadda Al-Shabaab.