Nabad la,aani waa nolol la,aan, nabaddu waa hooyada:- in wax la barto, in caqligu shaqeeyo, in xasilooni joogto ah la haysto, in midnimo la hiigsado, lana helo, inaan agoontu nagu badan, inaan gablanku yaraado, in hooyooyinka asaydu ku yaraato, inaan walwal lagu dhex jirin, in nidaam iyo kala dambayni soo noqoto, in adeegii bulshadu si dhaqso leh u laba lixaadsado, in wadaninimo dadku ku sifoobaan, nabada waxaa lagu mataalaa inay naas la nuugo tahay, marka macnaheedu ma ahan walax aan hadda ku soo koobi karo qoraalkayga gaabiska ah, laakiin waxaan is leeyahay in kaa mudani haka sii amba qaadaan, hana naadiyaan nabadda.

Aduunyada daafaheeda kala gadisan waxaa ku wada nool  bani,aadam kala jinsiya, kala diina, kala af ah, kala midaba, kala mabda ah, kala fikir fog iyo kuwo aanba diin lahayn, marka waxaa ayaan darro ah in soomaalidu intaasba aysan ku kala fogayn oo waliba nasiibkooda rabbi u qadaray in hal diin oo ah tii islaamka, oo ugu sax sanayd ilaah na waafajiyo 100%, waxaa intaas dheer inaan iimaankii  iyo caqiidadeenii ku  badalano inaan banaysano inaan is dilno, is dhacno, is kufsano, is xaqirno, beel beel isku fiirsano, is xaqdhowrkii la suuliyo, nafta oo la gooyo macno beesho, aano qabiil hari waydo, ilaa la yiraa haddii shiikh dadka wacdiyo, kumuu ahaa? halkii looga mahad celin lahaa muxaadaradiisa, ajirna laga macaashi lahaa.

Waxaan jeclaan lahaa inaan ku rogmado qaabka  nabadda ee hadda ka curatay magaa looyinka soomaalida gaar ahaan magaalada casimada noo ah, oo aad moodo in wax kasta ay ku xiran yihiin, jiraka banii,adamka wuxuu ka kooban yahay xubno fara badan, oo kala muhiim san, mid walibana shaqo cayiman ay qabato, laakiin maskaxda ayaa koon taroosha dhaq-dhaqaaqa jira oo dhan, marka caasimadu waa maskaxdii koontarooli lahayd magaalooyinka wadankeena hooyo, waxaana laysku raacay in marka hore nabada lagu soo dabaalo caasimada kadibna la gaar siiyo waaxaha kale ee dalkeena, sidaasi darteed waxaa xusid mudan in hal ruux loo magacaabo duqii iyo guddoomiyihiba, taasina ay keeni karto shaqo hagar la,aana oo aan barax lahayn, waxaa kaloo soo dhawayn mudan doodii ay horseedka ka ahaayeen gudoomiye cadde iyo wax garadkii waligooba ku taamayey inay mar uun hooska nabadda harsadaan.

Muqdishow waa hooyada himilooyinka nabada, waa meesha qof waliba ku leeyahay hoygiisii gashiino, kaan ku lahayna ku taamayo inuu mar uun xamaroo nabada ku helo nabad wadaaga oo sidii lagu yaqiin barisamaadkii, la wada mushaaxo, xamar waxaa ku yaala goobihii adeega oo dhan, waa meesha kaliya oo qarankii soomaaliyeed laga yagleeli karo, sidaasi darteed waxaan leeyahay waa in loo hagar baxaa sidii isbaarooyinka loo wada qaadi lahaa, khadadka ama aagaga loo midayn lahaa, hogaamiyayaasha wasiirada noqdayna waa inay ilaaliyaan nabadda ay awal ceelka ku rideen, lana shaqeeyaan, una shaqeeyaan shacabka ay matalaan, una hogaansamaan xukuumadda ay wasiirada ka yihiin oo ay iyagu gacantooda ku soo dhoo-dhoobeen, kuna soo ansixiyeen  magaalada nayroobi, xilligii ay baarlamaanka ahaayeen, taasoo la dhihi karo iyagaa doortay kii ugu horseedka ahaa xaga dad laynta, isaguba qirsan yahay, inuu yahay habaar qabihii qaliinka umadeena, ama aabihii mucaaradka oo ilaa hadda ka meereeysanaaya inuu hor
 yimaado hogaamiyayaashii awalba doortay.

Marka laysku soo duubo waa in wasiiradu ixtiraamaan qaanuunkii lagu magacaabay iyo ra,iisul wasaarihii magacaabay oo ay baarlamaanku ansixiyeen, waa in shaqada baarlamaanka la ixtiraamaa, tan xukuumadana sidoo kale la ixtiraamaa, tan madawaynuhuna coontroolkii qaynuunku u cayimay ku ekaadaa, maskax fur-furana lala yimaadaa, si dib u heshiisiintii iyo dib u dhiskii dalka looga guul gaaro, ummaduna nabadeey ku nastaan ku helaan, waxaan ku soo gaba gabaynayaa saxaafadu waa inay dhinaca nabadda naadiyaan oo ay iska daayaan colaad naadinta, oday dhaqameedyadu waa inay sidoo kale la shaqeeyaan maamulada gobol walba laga agaagumay, ha noqdaan kuwo dawladu magacowday ama kuwo soo jireena intaba, gaar ahaan midka xamar waa in si hagar la,aan loola shaqeeyaa, waxaa la yiraa far kaligeeda fool ma dhaqdo, quruxduna waa inay isu tana sulaan maamuladii ku meel gaarka ahaa ee awal ka jiray intaan xukuumadda geedi soo magacaabin guddoomiyaha xaaqinka wata oo aan qoriga wadan sida lagu yaqaan amaba
  uu isgu umadda u sheegay.

Waxaan ognahay in xamar awoodeeda ay gacanta ugu jirto, maxkamado islaami ah, ganacsato iyadu is maamusha iyo hogaamiyayaal hadda wanaag ku mano sheegta, laakiin cub iyo cir ama cad iyo madow horay u soo dheeli jiray, yaraantoodiina goobaha gool-goolka ku soo bar baaray, haddase u muuqda inay bad baadadu dhab ka tahay qaarkood, waa hadeey fuliyaan waxay ku hadaaqaayeen dhawrkii bilood ee la soo dhaafay, waxaan ku khatimaa HALLA NAADIYO NABADDA, si wada jira, shacabkuna waa inay horseed joogto ah u noqdaan maamulka iyga ka masuulka ah.

Wabillaahi towfiiq.