Madaxweynaha Soomaaliya Sheekh Shariif Sheekh Axmed ayaa xalay Qudbad dheer u jeediyay Jaaliyadda Soomaaliyeed ee ku nool dalka Ingiriiska, waxaana hoolka xaflada ka dhacaysay oo ahaa 3-Dabaq ka soo qeybgalay in ka badan 10-kun oo Soomaali ah, kuwaasi oo ka kala yimid magaalooyinka Ingiriiska iyo wadamada ku dhow.

Madaxweynaha ayaa sheegay in loo baahan yahay in jaaliyadda ku dhaqan dalka Ingiriiska inay u istaagaan sidii ay u taageeri laahaayeen Dowlada Soomaaliyeed, islamarkaana ay uga qeyb qaadan lahaaen sidii dalka loogu soo celin lahaa nabad iyo kala danbeyn.

“Waxaan heysanaa fursadihii ugu muhiimsanaa, waxaan heysanaa taageeradii shacabka, tan caalamka iyo annagoo diyaar u ah inaan gudano waajibka na saaran, waa inaad naftiina u hurtaan sidii loo soo celin lahaa sharaftii nalagu yaqiin iyo gobanimadii” ayuu yiri madaxweyne Sheekh Shariif Sheekh Axmed.

Madaxweynaha ayaa shaaca ka qaaday in dalka ay ku soo duuleen gumeysi huwan magac diimewed, wuxuuna culimada Soomaaliyeed uga mahad celiyay sida ay u cadeeyeen in kooxdaan aanay diin wadin.

Madaxweunaha ayaa waxa uu sheegay in cid waliba oo ka soo herjeeda nabadda, dowladnimada umada Soomaliyed iyo hormarka ay qasaaro ku danbeyn doonto maadama shacabku ay diyaar u yihiin in dalkoda ay dhiiggooda u huraan.

Madaxweynaha Soomaliya ayaa jaaliyada Soomaaliyeed ee Ingiriiska ku nool ka codsaday in ay ka qeyb qaataan mashruuc dhaqaale loogu uruurinayo sidii dib loogu soo celin lahaa adeegyadii bulshada sida cusbitaalada, dhismayaasha, wadooyinka iyo in sidoo kale dhalinta Somaliyeed ee la marin habaabiyay xaqa loogu sheegi lahaa.

Sheekh Shariif Madaxweynaha Soomaaliya wuxuu ka warbixiyay wax qabadka dowladda mudadii ay jirtay, wuxuuna sheegay in wax badan ay u qabsoomeen dowladda, madaxweynaha ayaa kula dardaarmay dadka Soomaliyeed in dalkooda ay u dhintaan iyagoo ku dadaalaya hormarkiisa oo ay tusaale u noqdaan wasiiradii, xildhibaanadii iyo saraakiishii u geeriyootay iyagoo shacabkooda u adeegaya.

Kulnkaasi balaaran uu madaxweynaha la yeeshay ayaa waxay ku soo gabagabowday si wanaagsan, iyadoo intii ay socotayna ay riwaayado iyo heeso dhaxalgal ah ku soo bandhigeen qaar ka mid ah fanaaniintii Qaranka oo ay ka mid ahaayen Axmed Naaji Sacad, Faadumo Qaasim Hilowle, C.risaaq Axmed Gaadcaco, Bashiir Cali Xuseen, Cabdi Shire Jooqle iyo kuwo kale oo aad u fara badan.

Waxaa xafladaasi Xiriirinaayay Wariyaha Caanka ah ee Ragge Oomaar, iyadoo ammaanka halka Qudbadda ka socotay ay ilaalinaayeen Ciidamada Ingiriiska iyo ilaalo Soomaaliyeed.