"War saxaafadeed Xisbiga Dimoqraadiga Banadir..."
.

Ra'yi  18Febr2011 Calayaale "War saxaafadeed Xisbiga Dimoqraadiga Banadir..." REF: XDB/2/100 DATE: 17/02/2011 Ku : Dhammaan Wax Garadka Bahweynta BANADIRLAND STATE (EX BANADIR) (GOBOLADA SHABEELADA DHEXE, BANADIR, SHABEELADA HOOSE). UGAASYADA, SALAADIINTA, MALAAQYADA, AQOONYAHANADA, HAWEENKA, ODAY DHAQAMEEDYADA Ujeedo: KA HORTAGGA BOOBKA SIYAASADEED IYO JAHWAREERKA KA SOCDA MAGAALADA MUQDISHU. Walaalayaal,Mudanayaal iyo Marwooyinba waxaan ku farax sanahay inan idiin soo gudbino Baaqan Furan ee la xiriira aayaha iyo Mustaqbalka Banaadirland State(EX BANADIR). Dadka ku abtirsada saddexdan Gobol oo hore la isugu dhihi jiray Regione Benadir ama ex banaadir ama Banadir zone waa dad xadaaradooda ay sarayso Soomaliya iyo dunidane aad looga yaqaan isla markaana gobol ahaan waa gobol Alle ku mannaystay Baarwaaqo dadkiisana Alle u hibeeyey Aqoon iyo Dhaqan Suuban oo uu u horeeyo Iimaanka waana dad isku kalsoon kuna kalsoon inay wax soo saarkooda ku noolaadaan, mana ahan dad dhaqan ahaan ku noolaan jiray shaxaad ama boob iwm. Gobolka waxa uu can ku yahay ku dhaqanka Diinta islaamka waana gobolka ugu aqoonta badan Culuumta Diinta Islaamka dalka intiisa kale, waxuuna ahaa yahayna halka loo soo doonto aqoonta Islaamka, waxaana ka dhashay Mashaaiqiin ku Caan baxay Fidinta Diinta Islamka sida : Shekh Awees ,Shekh Axmed gabyoow,Shekh Suufi,Shekh Cali Maye,Macalin Maxamed Bimaalow,Ow Xiltir, Ow Cismaan,Sheehk Ooyaaye ,Shekh Cabdi Cumar,Shekh Muxyadiin Celi,Shekh Axmed Mattan,Shekh Med Fiqi,Shekh Axmed Gaballe,Xasan Macalin,Shekh Abuukar Maccalin,Sheehk Cali Muumin, Sheehk Abiikar Mixdaar,Sheehk Ahmed Xaaji,Shekh Khaasim baraawey,Shekh Xuseen Cadde,Shekh maxamed Faarax, Shekh Aadan DheereSheehk Sacad Dauud,Sheehk Xaaji Maxamed Abgaal,Sheehk Cali Xasan Gacal iyo Mashaaiq kale oo badan oo halkan lagu soo koobi Karin. Sidoo kale Aqoonyahanada Dalka ugu caansan iyo saraakiisha Ciidmada waxa ay ka soo jeedaan gobolka Banaadir. Labaantankii sano ee dalka sharci iyo kala dambayn la'anta ka jirtay dadka gobolkan waxa uu aha kuwii loo geystay xadgudabyada ugu cuslaa ee dalka ka dhacay, labantankii sano oo dhan waxaa loo diiday inay nabad noqoto Gobolka Ex banaadir Halaag, dhimasho iyo burbur dhaqaale inta soo gaartayna xad ma laha. Qof kasta oo wax ku dheel ah ama doonayo inuu wax walaaqo ama burburiyo ama umad xasuuqo wuxuu ka soo haajiray gobolkiisii wuxuuna u soo haajiray Ex banadir , ha ku joogo magic, Siyaasi, Wadaad ama gaanacsade waxa uu horseed u yahay dhibka lagu hayo dadka iyo deegaanka Ex banaadir. Hadaba sida looga bixi karo marxaladaan labaatan jirsatay waa wada tashi iyo is xaqdhoowr dhan kasta ka yimada, hadda oo la joogo xilligii si miyir qab ah looga xaajoon lahaana waxaa soo baxaya ifafalo xun xun oo sii doonaya in dhibka uu ku sii jiro Ex Gobolka Banaadir,taasoo ay ugu wacan tahay dad ay u muuqdaan oo keli inay iyaga oo qur ah wax noqdaan waxaana hogamiya damac waalan oo aan caqliu iyo cilmi toona ku dhisnayn oo ah aniga aan wax noqdo ama aan kursiga ku fadhiisto. War hooy kagaasi kursiga ma ummadda ayaa loogu adeegayaa mise ummadda ayaa lagu gumaadayaa ? Haddii Ummadda loogu adeegayo u daa talada iyaga ayey ka go'dayee intaas oo aqoon iyo sharaf leh ayuu leeyahay ee adiga oo aad is taqaanid maxaamku hor dhigay. Ujeedadaadsa wey iska cadahay waxa ad u socoto waa Gumad Raadis, mana la joogo waqtigeedii ee yuusan waqti kaaga dhumin inta goori goor tahay isu caqli Celi. Warkani waxa uu ku waajahan yahay kuwa doonayo inay aayaha Ummada Ex Banaadir ay wiiqaan iyaga oo damac waalan hogaaminayo islamarkaana daaha gadashiisa ka ariminayo, doonayana inay adeegsadan dad niyad sami ay waddo iyo dad kale oo sharaf leh sida Duubab,Culimo,Odoyaal dhaqan iyaga oo ugu sheekeynayo wanaag ayaan qabanaynaa. Hadaba walalyaal haddii laga tashanayo aayaha Ex Banadir lana doonayo in la sameeyo Maamul Goboleed ma aha in afar qof oo keli oo isugu timid Hotel dhexdiis inay talada leeyin . Tan kale dadka la soo xulay ee loo soo magacabay inay dastuur(ku sheeg) u soo diyaariyan dawlad Goboleedka Ex Banaadir soow maha tacdi iyo gef loo geysanayo Ummadda Reer Banaadir ? dadka la rabo inay u soo diyariyan dastuurka dawlad goboleedka Ex Banaadir kuma aanan arag wax kaleba iskaba daaye hal qof oo xitaa qeexi karaa waa maxay Dastuur ? Imisa Sharci yaqaan oo weliba jaamacdo sharciga ka dhiga ayaa ka dhashay Ex Banaadir, marka waa ihaano loo geysanayo dadka Reer Ex Banaadir weyna ka weyn tahay ihaanooyinkii horey loogu geystay. Tan Xigta in wax la samaysto iyo qaabka loo samaysanayo waxa ay ka go’daa inta arintu ay ka dhexeyso, baaq si rasmi ah oo la isugu yeerayayo oo arintaa la xiriirto oo aan maqaar saar ahayn weli ma dhicin. Marka baaq noocaas ah oo kale ah la sameeyo ayey ka soo bixi karaan in wax la samaysto, isla markaana guddiyada ku habboon la samaysto sida: Guddiga Qaban Qaabada Shir Weynaha Dawlaad Goboleedka . Marka la helo la iskuna waafaqo Guddiga qabnqaabada ayaa guddiga waxa uu magacabayaa Guddiga soo diyarinaysa Daraafka Dastuurka ama Xeer ama Axdiga Maamul Goboleedka iyada oo weli la isla meel dhigayo cidda loo magacaabayo hawlahaas oo kale tilmaanta ay yeelan karaan ( criteria ). Walaalakey Muxyadiin Xasan Afrax Gudoomiyaha Daladda Ururada Bulshada Rayadka ee Banaadir ( Banadir Civil Society Network ) waa ku naqaana waxaadna tahay shaqsi niyad wanagsan oo wax kasta xagga wanaagga ka fiiriya, balse arinkan deg deg ma galo iyo sahlasho, gadaashadana waxa looga jeeda ama ka muuqda dad aan bulsshada si toos ah u horiman Karin oo doonaya si maldahan inay isteejka ku soo koraan, taasina ma soconayso waana loo wada jeedaa , balse adiga sharaftaada iyo shaqsiyadaa ilaa iyo hadda wey dhowrsan yihiin, maro cad ayaa wadataa ee yeysan marada cad khad madow kaaga daadin kuwa lagu bartaya dhagarta ummdda . XISBIGA DIMOQRAATIGA BANADIR wuxuu ugu baaqayaa Bah weynta ku abtirsata Ex Banaadir inay si wada jir ah uga arinsadaan Maamul u samaynta BaanadirLand State, caqligooda, aqoontooda iyo hantidoodana ay u huraan, si ay u soo ceshadan maqaamkii Ex Banaadir lagu yiqiinay ,mana jirto cid marti ka ah hawshaan iyo cid marti loogu yahay. Ugu dambeyntii Xisbiga Dimoqraadiga Banaadir muddo laba sano ayuu ku howlan yahay qaabka ugu wanaagsan oo lagu xulan lahaa Guddiga qabanqaabada shirweyneha Dowlad Goboleedka BanadirLand oo loo wada dhan yahay,sharaf iyo karaamad leh oo sawiri karana dhamaan bahweynta BanadirLand, run ahaantiina taasi mid sahlan maaha oo waxay u baahantahay samir, dulqaad, waqti iyo howl fara badan. Guddigaan qabanqaabada wuxuu noqonayaa tilaabta ugu horeysa dhismaha maamul ku taagan sinaan iyo cadaalad awoodna u leh in uu soo afjaro marxaladaan 20ka sano ku habsatay shacabka reer BanadirLand. Wabillahi Towfiiq. Xisbiga Dimoqraatiga Banaadir soomaal@ymail.com  Welcome to Calayaale Page Sign  kuqor wixii Ra'yigaaga ah Name E-mail address Homepage URL Comments   Read Akhriso Webmaster@calayaale.com Tafatiraha wararka caalamka iyo  soomaliya Calayaale Media Center calayaal@yahoo.de kalasoo xiriir

_________________________________________________________